مصل الإنفلونزا
إيه هو مصل الأنفلونزا ؟
هو عبارة عن مصل أو تطعيم ضد الإنفلونزا (الفيروسية) وبينزل كل سنة عشان يحصن ضد الميكروبات المسببة للإنفلونزا واللى ممكن تتحور سنوياً ، وضد أكثر السلالات إنتشاراً
يوجد نوعين من الإنفلونزا
الأول انفلونزا فيروسى
والثاني إنفلونزا بكتيرى
إنفلونزا الفيروسى سببها فيروس وأعراضها زى البرد بس على أشد ومعاها كحة وسخونة وتكسير فى الجسم
اما البكتيرى دى أخطر شوية سببها بكتريا Haemophilus Influenzae
وممكن تسبب إلتهاب رئوى وإلتهاب أذن وسطى أولا قدر الله إلتهاب سحائي ودى تطعيمها بيتاخد فى الصحة (إجبارى) عند شهرين و4 و6 شهور (التطعيم الخماسي)
أما تطعيم الإنفلونزا الفيروسى ده مش فى جدول التطعيمات الإجبارية
المصل مش بيمنع أدوار البرد والإنفلونزا إنما بيدى حماية ٨٠٪ وده في صورة:
1.بيقلل حدة الأعراض
2.يقصر مدة الأعراض
3. والأهم إنه بيمنع المضاعفات
مين الي أفضل انه ياخد المصل
أولا ً:- الطفل اللى بيعانى من حساسية الصدر لإن دور الإنفلونزا والبرد من المثيرات اللي ممكن تدخله في ال attack فيتقفل صدره ويزيق
وينطبق برضه على الأطفال اللى بيعانوا من حساسيةالأنف
ثانيا الأطفال اللى مناعتهم ضعيفة اللى مجرد مابيجيلهم برد بيقلب بسخونة وجيوب انفية وكحة وإلتهاب فى الأذن أو اللى أعراض البرد بتطول معاهم أكتر من إسبوع مثلاً وعلطول في الشتا تعبانين
يفضل إعطاء المصل قبل دخول فصل الشتاء لأنه بيحتاج من إسبوعين إلي ثلاثة أسابيع لظهور تأثيره
يعني افضل توقيت لأخذ المصل شهور ٩ و ١٠ و ١١
ولا ينصح بإعطاءه أثناء أدوار البرد
جرعة المصل
لو الطفل عنده أقل من 6 شهور مش بيستخدم
ثانياً من 6 شهور ل 3 سنين بياخد (نص المصل)
ثالثاً فوق 3 سنين بيتاخد المصل كله
رابعا الطفل اللى أول مرة ياخده فى حياته ((يُفضل يكررالجرعة بعد شهر )) ؛ ولكن الكلام ده لحد 9 سنوات فقط
خامسا يعطى فى العضل أو تحت الجلد
بالنسبة للكبار ينفع ناخد ولاسيما ( كبار السن _ مرضي السكر والقلب_ مرضي حساسية الأنف أو الربو أو إلتهاب الجيوب الأنفية المزمن )
وفي الحمل يفضل بعد الثلاثة شهور الأولي
ليست هناك تعليقات: